1. ከምዚ ዚብል ቃል እግዚኣብሄር ድማ መጸኒ፣

2. ኣታ ወዲ ሰብ፣ እግዚኣብሄር ኣምላኽ ንሃገር እስራኤል ከምዚ ይብላ አሎ፣ መወዳእታ፣ ናብ ኣርባዕተ መኣዝን እታ ሃገርሲ መወዳእታ ይመጽእ አሎ።

3. ሕጂ መወዳእታ ኣባኺ መጸ፣ ቍጥዓይ ድማ ክሰደልኪ፣ ከም መገድኺ መጠን ክፈርደኪ፣ ኵሉ ጽያፍኪ ድማ ኣብ ልዕሌኺ ኸውርደልኪ እየ።

4. ዓይነይ ኣይኪንሕፈክን ኣነውን ኣይክርሕርሃልክን፣ ኣነስ መገድኺ ደኣ ኣብ ልዕሌኺ ኼምጻልኪ እየ፣ ጽያፍኪ ድማ ኣብ ማእከልኪ ኪኸውን እዩ እሞ፣ ንስኻትኩም እግዚኣብሄር ምዃነይ ክትፈልጡ ኢኹም።

5. እግዚኣብሄር ኣምላኽ ከምዚ ይብል አሎ፣ መዓት፣ ነይኑ ዝዀነ እኳ ደኣ መኦኣት እንሆ፣ ይመጽእ አሎ።

6. መወዳእታ መጸ፣ እቲ መወዳእታ መጸ፣ ተላዕለኪ፣ እንሆ ይመጽእ አሎ።

7. ኣታ ኣብ ሃገር እትነብር ዘሎኻ፡ ተራካ መጸካ። እቲ ጊዜ ብጽሔ፡ እልልታ ኣብ ኣኽራን ዘይስምዓላ መዓልቲ ዕግርግር ቀረበት።

8. ሕጂ ብቕልጡፍ ነድረይ ክኽዕወልኪ፣ ሃና ቝጥዓይ ከኣ ክወጸልኪ፣ ከም መጠን መገድኺ ድማ ክፈርደኪ፣ ንዅሉ ጽያፍኪ ኣብ ልዕሌኺ ኽወርዶ እየ።

9. ዓይነት ኣይኪንሕፍን እዩ፣ ኣነውን ኣይክርሕርሕን፣ ኣነስ ከም መጠን መገድኺ ኸምጽኣልኪ እየ፣ ጽያፍኪ ድማ ኣብ ማእከልኪ ኪኸውን እዩ። ንስኻትኩምውን እቲ ዚወቅዕ ዞሎስ ኣነ እግዚኣብሄር ምዃነይ ክትፈልጡ ኢኹም።

10. እንሃ እታ መዓልቲ እንሃ መጸት። ተራኺ በጽሔ። እታ ሸቦጥ ዐምበበት፣ ትዕቢት ከኣ ጠጥዔ።

11. ዓመጻስ ሸቦጥ ረሲእነት ኰይና ተላዕለት። ካባታቶም ሓደ እኳ የልቦን፡ ካብቲ ብዙሕ ህዝቦምን ካብቲ ሃብቶምን ካብቲ ግርማኦምን ዚተርፍ ሓደ እኳ የልቦን።

12. ዘመን በጺሑ፣ መዓልቲ ቐሪቡ አሎ። ጕሁር ቍጥዓ ኣብ ልዕሊ ዅሉ እቲ ብዙሕ ህዝቦም እዩ እሞ፣ ዚሻየጥ ኣይተሐጐስ፣ ዚሸይጥውን ኣህጕሄ።

13. እቲ ዚሸይጥ ብህይወቱ እኳ እንተሎ፣ ናብቲ ዝሸጦ ኣይኪምለስን እዩ። ብዛዕባ እቲ ብዙሕ ህዝቦም ዝዀነ ራእይ ንድሕሪት ኣይኪምለስን እዩ እሞ፣ ብዓመጽ ዚነብርሲ ንህይወቱ ዜጽንዓ ሓደ እኳ የልቦን።

14. መለኸት ተነፍሔ፣ ኵሉ ኸኣ ተዳለወ፣ ቍጥዓይ ግና ኣብ ልዕሊ ዅሉ እቲ ብዙሕ ዝህቦም አሎ እሞ፣ ኣብ ውግእ ዚኸይድ ሓደ እኳ የልቦን።

15. ኣብ ወጻኢ ሰይፊ ኣብ ውሽጢ ኸኣ ፌራን ጥሜትን አሎ። እቲ ኣብ መሮር ዘሎ ብሰይፊ ክመውት፡ እቲ ኣብ ከተማ ዘሎውን ፌራን ጥሜትን ኪውሕጦ እዩ።

16. እቶም ካባታቶም ዘምለጡ ግና ከምተን ርግብታት ሽንጭሮ፣ ነፍሲ ወከፍ ብኣበሳኦም እናቘዘሙ፣ ኣብ ኣኽራን ኪዀኑ እዮም።

17. ኵለን ኣእዳው ኪሕለላ፣ ኵለን ኣብራኽ ድማ ከም ማይ ከፈሳ እየን።

18. ክሊ ኺዕጠቑ፡ ራዕዲ ኪኽደኑ፡ ኵሉ ግጽ ብሕንኪ ኺጕልበብ፡ ኵሉ ርእስታቶም ድማ ኪበርሕ እዩ።

19. ብሩሮም ኣብ ኣደባባያት ኪድርብዮ፣ ወርቆም ከኣ ከም ርኹስ ነገር ኪኸውን እዩ። ብሩሮምን ወርቆምን ናይ ሓጢኣቶም እምኒ መዓንቀፊ ስለ ዝዀነ፣ በታ መዓልቲ ቝጥዓ እግዚኣብሄር ኬድሕኖም ኣይተኻእሎን፣ ንጥሜቶም ኣይኬጽግቦን፣ ንኸብዶምውን ኣይኪመልኣሎምን እዩ።

20. መልክዕ ስልማቶም ንትዕቢት ኰኖም፣ ምስሊ ርኽሰቶምን እቶም ዜፈንፍኑ ጣኦታቶምን ገበሩሉ። ስለዚ ኣነ ንኣታቶም ንርኽሰት ገበርክዎ።

21. ዘመተ ኪኽውን ድማ ኣብ ኢድ ጓኖት፣ ምርኮ ኪኸውን ከኣ ንረሲኣን ምድሪ ኣሕሊፈ ኽህቦ እየ፣ ንሳቶም ድማ ኬርክስዎ እዮም።

22. ካባታቶም ገጸይ ክመልስ እየ፣ ንሳቶም ከኣ ንመዝገበይ ኬርክስዎ፣ ገፋዕቲ ኣትዮም ድማ ኬርክስዎ እዮም።

23. እዛ ሃገር እዚኣ ቅትለተ ደመ ነፍሲ መሊኣ አላ፣ እዛ ኸተማ እዚኣውን ዓምጽ መሊኣዋ እዩ እሞ፣ ሞቝሕ ኣዳሉ።

24. ነቶም ኣዝዮም ሕሱማት ካብ ህዝብታት ከምጽእ እየ እሞ፣ እዚኣቶም ኣባይቶም ኪወርሱ እዮም። ንትዕቢት እቶም ሓያላት ከጥፍኦ እየ፣ መቓድሶም ከኣ ኪረኽሳ እየን።

25. ጥፍኣት ይመጽእ አሎ፣ ንሳቶም ከስ ሰላም ኪደልዩ እዮም፣ ኣይርከብን ከኣ።

26. መዓት ኣብ ርእሲ መዓት ኪመጽእ፣ ወረውን ኣብ ርእሲ ወረ ኪኸውን እዩ። ካብ ነብዪ ራእይ ኪደልዩ፣ ግናኸ ሕጊ ኻብ ካህን፣ ምኽሪውን ካብ ኣረገውቲ ኺጠፍእ እዩ።

27. እቲ ንጉስ ኪትክዝ፣ እቲ መስፍን ድማ ሓዘን ኪኸደን፣ ኣእዳዉ እቶም ህዝቢ እታ ሃገር ራዕራዕ ኪብል እዩ። ከም መጠን መገዶም ክፈድዮም፣ ከከም ዚግብኦም ከኣ ክፈርዶም እየ። ኣነ እግዚኣብሄር ምዃነይውን ኪፈልጡ እዮም።

Chap 6
Chap 8