Tools 1. ብዛዕባ ሞኣብ። እግዚኣብሄር፡ ጐይታ ሰራዊት ኣምላኽ እስራኤል፡ ከምዚ ይብል አሎ፡ ኔቦ ዖንያ እያ እሞ፡ ወይልኣ። ቂርያታይም ነወረት ተታሕዘትውን፡ እቲ እምባ ነወረን ፈረሰን።

Tools 2. ድሕርዚ ሓበን ሞኣብ የሎን። ህዝቢ ኸይትኸውንሲ ንዑናይ ነጥፍኣያ። ኢሎም ኣብ ሄስቦን እኩይ ነገር ይፍሕሱላ አለዉ። ኣቲ መድሜን፡ ንስኺ ድማ ክትጠፍኢ ኢኺ፡ ሰይፊ ኺስዕበኪ እዩ።

Tools 3. ዋይዋይን ጥፍኣትን ብርቱዕ ምዕናውን ካብ ሆሮናይም ይስማዕ አሎ።

Tools 4. ሞኣብ ተደቚሰት፡ ደቃ ዋይወዮም ኣስምዑ።

Tools 5. ኣብ ቊልቁል ሆሮናይም ብናይ ምፍራስ ዜሸግር ጭንቂ ቚዝማ ይስማዕ አሎ እሞ፡ ኣብ ዓቐብ ሉሂት ብኽያት እናበኸዩ ይድይቡ አለዉ።

Tools 6. ህደሙ፡ ነፍስኹም ኣድሕኑ፡ ከም ገረብ ሑመር ኣብ በረኻ ኹኑ።

Tools 7. ብግብርኽን ብሃብትኽን ተኣሚንኪ ኢኺ እሞ፡ ስለዚ ንስኺ ድማ ክትተሐዚ ኢኺ፡ ኬሞሽን ካህናቱን መሳፍንቱን ከኣ ሐቢሮም ኪማረኹ እዮም።

Tools 8. ከምቲ እግዚኣብሄር ዝበሎ፡ ሓንቲ ኸተማ እኳ ኣይከተምልጥን እያ፡ እቲ መጥፍኢ ንዂለን ከተማታት ኪመጸን እዩ፡ እቲ ለሰ ኺጠፍእ፡ እቲ ጐልጐል ከኣ ኪበርስ እዩ።

Tools 9. ሞኣብ ነፊራ ኽትሀድምሲ፡ ኣኽናፍ ሀብዋ፡ ከተማታታ ኸኣ ዚነብረን ዜብለን ኰይነን ኪባድማ እየን።

Tools 10. እቲ ንዕዮ እግዚኣብሄር ዕሽሽ ኢሉ ዚገብሮ ርጉም ይኹን፡ ንሰይፊ ድማ ደም ከይዂዑ ዚገትእ ርጉም ይኹን።

Tools 11. ሞኣብ ካብ ንእሽቶኣ ጀሚራ ህድእቲ ነበረ፡ ኣብ ልዕሊ ሓተልኣውን ዐረፈት፡ ካብ ሳርማ ናብ ሳርማ ኸኣ ኣይተቐጥፈትን፡ ተማሪኻ ድማ ኣይከደትን፡ ስለዚ ጣዕማ ኣርነበት፡ መኣዛኣውን ኣይተለወጠን።

Tools 12-13. ስለዚ እንሆ፡ ኣነ ዚቐድሕዋ ቐዳሕቲ ዝሰደላ ጊዜ ትመጽእ አላ፡ ሰራሙኣ ኼዕርቑ፡ ኣጋንኣ ድማ ኪሰባብሩ እዮም፡ ከምቲ ቤት እስራኤል በታ እተወከለታ ቤት-ኤል ዝሐፈረቶ፡ ሞኣብ ድማ ከምኡ ብኬሞሽ ክትሐፍር እያ፡ ይብል እግዚኣብሄር።

Tools 14. ንስኻትኩም፡ ኣብ ውግእ ጀጋኑን ሃጥራትን ኢና፡ እትብሉስ ከመይ ኢልኩም ደኣ ኢኹም፡

Tools 15. እቲ እግዚኣብሄር፡ ጐይታ ሰራዊት ዝስሙ ንጉስ፡ ሞኣብ ፈረስት፡ ናብ ከተማታታ ወጹ፡ እቶም ሕሩያት ኣጒባዛ ናብ ማሕረዲ ወረዱ፡ ይብል አሎ።

Tools 16. መዓት ሞኣብ ኪመጽእ ቀሪቡ እዩ፡ ጸበብኣ ድማ ቀልጢፉ የሳጒም አሎ።

Tools 17. ኲላትኩም ኣብ ከባቢኣ ዘሎኹም፡ ብኸዩሎኣ፡ ኲላትኩም፡ ስማ እትፈልጡ ኸኣ፡ እቲ ድልዱል በትርን እቲ ምልምል ዘንግንካ ኸመይ ኢሉ ተሰብረ፡ በሉ።

Tools 18. ኣቲ ኣብ ዲቦን እትነብሪ ዘሎኺ ጐርዞ፡ እቲ መጥፍኢ ሞኣብ ናባኺ ደዪቡ፡ ንዕርድታትኪ ኣፍሪሱ እዩ እሞ፡ ካብ ክብረትኪ ውረዲ፡ ኣብ ኣጻምእ ተቐመጢ፡

Tools 19. ኣቲ ኣብ ኣሮኤር እትነብሪ ዘሎኺ፡ ኣብ መገዲ ደው በሊ ጠምቲ ኸኣ፡ ነቲ ዝሀደመን ነታ እተምልጥን፡ እንታይ ወሪዱ እዩ፧ ኢልኪ ድማ ሕተቲ።

Tools 20. ሞኣብ ተሳዒራ እያ እሞ፡ ነወረት፡ ኣእውዩ፡ ጨድሩ፡ ሞኣብ ከም ዝፈረሰት ኣብ ኣርኖን ኣውርዩ።

Tools 21. ፍርዲ ኣብቲ ሃገር ጐልጐል፡ ኣብ ሆሎን፡ ኣብ የህጻ፡ ኣብ መፍዓት፡

Tools 22. ኣብ ዲቦን፡ ኣብ ኔቦ፡ ኣብ ቤት-ዲብላታይም፡

Tools 23. ኣብ ቂርያታይም፡ ኣብ ቤት-ጋሙል፡ ኣብ ቤት-ምዖን፡

Tools 24. ኣብ ቅርዮት፡ ኣብ ቦጽራ፡ ኣብ ዝረሐቓን ዝቐረባን ኲላተን ከተማታት ሞኣብን መጸ።

Tools 25. ቀርኒ ሞኣብ ተሰልዔ፡ ቅልጽሙ ተሰብረ፡ ይብል እግዚኣብሄር።

Tools 26. ሞኣብ ንእግዚኣብሄር ርእሱ ኣልዒሉሉ እዩ እሞ፡ ኣስክርዎ። ኣብ ትፉኡ ጠንቀላዕላዕ ይበል፡ መላገጺውን ይኹን።

Tools 27. እስራኤልዶ መላገጺ ዀይኑልካ ኣይነበረን እዩ፧ ብዛዕባኡ ኽትዛረብ ከሎኻ፡ ርእስኻ እትንቕንቕሲ ኣብ ማእከል ሰረቕቲ ደዀን ተረኺቡ እዩ፧

Tools 28. ኣቱም ኣብ ሞኣብ እትነብሩ፡ ካብተን ከተማታት ልቐቑ፡ ኣብ ኣኻውሕ ከኣ ስፈሩ። ከምታ ኣብ ገምገም ጸድሪ ቤታ እትሰርሕ ርግቢ ድማ ኹኑ።

Tools 29. ምክሔ ሞኣብን ብርቱዕ ትዕቢቱን ፍኽናኔኡን ኲርዓቱን ድፍረቱን ኲዕናኔ ልቡን ሰማዕና።

Tools 30. ኣነ ንዂራኡን ነቲ ኸንቱ ዝዀነ ትምክሕቱን እፈልጥ አሎኹ፡ ግብሩውን ከንቱ እዩ፡ ይብል እግዚኣብሄር።

Tools 31. ስለዚ ንሞኣብ ኤልቅሰሉ፡ ኣብ ኲሉ ሞኣብ ከኣ እቚዝም አሎኹ። ንሰብ ቂር-ሄሬስ እህህ ይብሉሎም አለዉ።

Tools 32. ኣቲ ተኽሊ ወይኒ ሲብማ፡ ካብቲ ብኽያት ያዕዜር ዚበዝሕ ገይረ እበኽየልኪ አሎኹ። ሓረግኪ ኽንየው ባሕሪ ተሳገረ፡ ክሳዕ ባሕሪ ያዕዜርውን በጽሔ። እቲ መጥፍኢ ኣብ እቶት ፍረ ሓጋይክን ኣብ ቀውዒ ዘቢብክን ወረደ።

Tools 33. ካብቲ ፈራዪ ግርሁን ካብ ሃገር ሞኣብን ፍስሃን ደስታን ጠፍኤ። ነቲ ወይኒ ኣብ መሓምተሊኡ ኣወዳእክዎ። ድሕርዚ ዘቢብ ብእልልታ ኣይሕምተልን፡ እቲ እልልታ ድማ እልልታ ኣይኰነን።

Tools 34. ማያት ነምሪም ከኣ ምድሪ ኣጻምእ ኪኸውን እዩ እሞ፡ ኣውያት ሔስቦን ክሳዕ ኤልዓለ፡ ክሳዕ የህጻ፡ ካብ ጾኣር ክሳዕ ሆሮናይም፡ ክሳዕ ኤግላት-ሸሊሻ ኺስማዕ እዩ።

Tools 35. ኣነ ኸኣ ነቲ ኣብ ሞኣብ ኣብ በረኽቲ ዚድይብን ንኣማልኽቱ ዚዐጥንን ከጥፍኦ እየ፡ ይብል እግዚኣብሄር።

Tools 36. እቲ ዝደለብዎ ጠፊኡ እዩ እሞ፡ ስለዚ ልበይ ንሞኣብ ከም እምብልታ ይቚዝም፡ ንሰብ ቂር-ሄሬስ ከኣ ልበይ ከም እምብልታ ገይሩ ይቚዝመሎም አሎ።

Tools 37. ስለዚ ርእሲ ዘበለ ተላጽዩ፡ ኲሉ ጭሕሚ ተቘሪጹ፡ ኲላተን ኣእዳው ብጡሓት እየን፡ ኣብ ሓቛቚ ድማ ከሊ አሎ።

Tools 38. ንሞኣብ፡ ባህ ከም ዘየብል ኣቕሓ ገይረ፡ ሰባቢረያ እየ እሞ፡ ኣብ ኲሉ ኣናሕስ ሞኣብን ኣብ ዕዳጋታታን ቊዝማ አሎ፡ ይብል እግዚኣብሄር።

Tools 39. ኣየ፡ ከመይ ኢላ ተሳዕረት፡ ኢሎም የልቅሱ አለዉ። ከመይ ኢላ ሞኣብ ነዊራ ዝባና መለሰት። ሞኣብ ንዂሎም እቶም ኣብ ከባቢኣ ዘለዉ ድማ ንመላገጽን ንመሰክሕን ክትከውን እያ።

Tools 40. ስለዚ እግዚኣብሄር ከምዚ ይብል አሎ፡ እንሆ፡ ከም ንስሪ ይነፍር፡ ኣኽናፉ ከኣ ኣብ ልዕሊ ሞኣብ ይዝርግሕ አሎ።

Tools 41. ቂርያት ተታሕዘት፡ ዕርድታት ድማ ተወስደ፡ በታ መዓልቲ እቲኣ ልቢ እቶም ጀጋኑ ሞኣብ ከም ልቢ ቕልውላው ዝሐዛ ሰበይቲ ኪኸውን እዩ።

Tools 42. ሞኣብ ንእግዚኣብሄር ተዐብያትሉ እያ እሞ፡ ድሕርዚ ህዝቢ ኸይትኸውንሲ ኽትጠፍእ እያ።

Tools 43. ኣታ ኣብ ሞኣብ እትነብር ዘሎኻ፡ ፍርሃትን ጒድጓድን መፈንጠራን ኣብ ልዕሌኻ አሎ፡ ይብል እግዚኣብሄር።

Tools 44. ኣነ ዓመት ቅጽዓቶም ኣብ ርእሲኣ፡ ኣብ ርእሲ ሞኣብ ከውርድ እየ እሞ፡ ካብ ፍርሃት ዚሀድም ናብ ጒድጓድ ኪወድቕ፡ ካብ ጒድጓድ ዚወጽእ ከኣ ኣብ መፈንጠራ ኺተሐዝ እዩ፡ ይብል እግዚኣብሄር።

Tools 45. እቶም ሃደምቲ ደኺሞም፡ ኣብ ጽላል ሔስቦን ደው ኢሎም አለዉ። ካብ ሔስቦን ሓዊ፡ ካብ ማእከል ሲሆን ከኣ ሃልሃልታ ወጺኡ እዩ እሞ፡ ነቲ ጐቦታት ሞኣብን ነቲ ርእሲ ደቂ ታዕታዕን በሊዕዎ እዩ።

Tools 46. ኣቲ ሞኣብ፡ ኣወዳትኪ ተማሪኾም፡ ኣዋልድኪ ኸኣ ኣብ ምርኮ ኸይደን እየን እሞ፡ ወይለኺ፡ ህዝቢ ኬማሽ ጠፊኡ እዩ።

Tools 47. ኣብተን ዳሕሮት መዓልትታት ግና ንሞኣብ ካብ ምርኮ ኽመልሳ እየ፡ ይብል እግዚኣብሄር። ክሳዕ እዚ እዩ እቲ ፍርዲ ሞኣብ።