Tools 1. ደቂ እስራኤል ግና ኣብቲ ሕሩም ነገር ኣበሳ ኣበሱ። ካብ ነገድ ይሁዳ ኣካን፡ ወዲ ካርሚ ወዲ ዛብዲ ወዲ ዜራሕ፡ ካብቲ እተሐርመ ወሰደ እሞ፡ ኵራ እግዚኣብሄር ኣብ እስራኤል ነደደ።

Tools 2. እያሱ ድማ ካብ ያሪኮ ናብታ ብምብራቕ ቤት-ኤል ኣብ ጥቓ ቤት-ኣዌን ዘላ ዓይ ሰባት ሰደደ፡ ደይብኩም ነታ ሃገር ሰልይዋ፡ ኢሉ ተዛረቦም። እቶም ሰባት ከኣ ደይቦም ንዓይ ሰለይዋ።

Tools 3. ናብ እያሱ ተመሊሶም ድማ፡ ኵሉ ህዝቢ ኣይደይብ፡ ሒደት እዮም እሞ፡ ንብዘሎ ህዝቢ ናብኣ ኣይተድክሞ፡ ክልተ ወይ ሰለስተ ሽሕ ዚአክል ሰብ ደኣ ይደይብ፡ ንዓይ ከኣ ይውቅዕዋ፡ በልዎ።

Tools 4. ካብቲ ህዝቢ ድማ ሰለስተ ሽሕ ዚአክል ሰብ ናብኡ ደየበ። ግናኸ ካብ ቅድሚ እቶም ሰብ ዓይ ሀደሙ።

Tools 5. እቶም ሰብ ዓይ ካብኦም ኣስታት ሰላሳን ሹድሽተን ሰብ ቀተሉ፡ ካብ ደገ ኽሳዕ ሰባሪም ሰጐጕዎም፡ ኣብቲ ቝልቍለት ድማ ወቕዕዎም። ሽዑ ልቢ እቲ ህዝቢ መኸኸ፡ ከም ማይ ከኣ ዀነ።

Tools 6. እያሱን እቶም ዓበይቲ እስራኤልን ድማ ክዳውንቶም ቀዲዶም ኣብ ኣራእሶም ድማ ሓመድ ነስኒሶም፡ ኣብ ቅድሚ ታቦት እግዚኣብሄር ክሳዕ ምሸት ብገጾም ናብ ምድሪ ተደፍኡ።

Tools 7. እያሱ ድማ በለ፡ ኣየ ጐይታይ እግዚኣብሄር ኣብ ኢድ ኣሞራውያን ሂብካ ኸተጥፍኣናስ፡ ስለምንታይ ደኣ ነዚ ህዝቢ ንዮርዳኖስ ዘሳገርካዮ፧ እየ፡ ኣብ ስግር ዮርዳኖስ እንተ ንቕመጥ፡ ግዳ ምፈቶና።

Tools 8. ወይለይ ጐይታይ፡ እስራኤል ዝባኑ ናብ ገጽ ጸላእቱ ኻብ መለሰ፡ እንታይ ክብል እየ፧

Tools 9. ከነኣናውያንን ኣብታ ሃገር ዚነብሩ ዅሎምን፡ ኪሰምዑ እዮም እሞ ኪኸቡና፡ ስምና ድማ ካብ ምድሪ ኼጽንቱ እዮም። ነቲ ዓብዪ ስምካ ደኣ እንታይ ክትገብር ኢኻ፧

Tools 10. እግዚኣብሄር ድማ ንእያሱ በሎ፡ ተንስእ፡ ስለምንታይ ከምዚ ብገጽካ ትድፋእ፧

Tools 11. እስራኤል ሓጢኣት ገበረ፡ እቲ ዝአዘዝክዎም ኪዳነይ ከኣ ኣፍረሱ፡ ካብቲ ሕሩም ወሰዱ ሰረቑ ኸኣ፡ ሐሰዉ ድማ፡ ኣብ ማእከል ኣቕሓኦምውን ኣንበርዎ።

Tools 12. ስለዚ ደቂ እስራኤል ተሐሪሞም እዮም እሞ፡ ዝባኖም ናብ ገጽ ጸላእቶም ይመልሱ እምበር፡ ኣብ ቅድሚ ጸላእቶም ኪቘሙ ኣይክእሉን። ነቲ ሕርሚ ኻብ ማእከልኩም እንተ ዘየጥፋእኩም። ኣነ ደጊም ምሳኻትኩም ኣይከውንን እየ፡

Tools 13. ተንስእ እሞ፡ ነቶም ህዝቢ ቀድሶም፡ በሎምውን፡ ንጽባሕ ተቐደሱ። እግዚኣብሄር ኣምላኽ እስራኤል ከምዚ ይብል አሎ እሞ፡ ኣታ እስራኤል፡ ሕርሚ ኣብ ማእከልካ አሎ፡ ነቲ ሕርሚ ኻብ ማእከልኩም ክሳዕ እተርሕቕዎ፡ ኣብ ቅድሚ ጸላእትኻ ኽትቀውም ኣይትኽእልን።

Tools 14. ጽባሕ በብነገድኩም ቅረቡ። ኪኸውን ድማ እዩ፡ እቲ እግዚኣብሄር ዚወስዶ ነገድ በብዓሌቱ ይቕረብ። እቲ እግዚኣብሄር ዚወስዶ ዓሌት ድማ፡ በብማይ ቤቱ ይቕረብ። እቲ እግዚኣብሄር ዚወስዶ ማይ ቤት ከኣ፡ በብሰብኣይ ይቕረብ።

Tools 15. ኪኸውን ድማ እዩ፡ እቲ ሕርሚ እተረኽቦ፡ ኪዳን እግዚኣብሄር ኣፍሪሱ ኣብ እስራኤል ከኣ ነውሪ ገይሩ እዩ እሞ፡ ንሱን ዘለዎ ዅሉን ብሓዊ ይንደድ።

Tools 16. እያሱ ከኣ ንጽብሒቱ ኣንጊሁ ተንስኤ፡ ንእስራኤል ድማ በብነገዱ ኣቕሪቦ እሞ ነገድ ይሁዳ ተወስደ።

Tools 17. ንዓሌታት ይሁዳ ኸኣ ኣቕረቦም እሞ ዓሌት ዜራሓውያን ወሰደ። ንዓሌት ዜራሓውያን ድማ በብሰብኣይ ኣቕረቦም እሞ ዛብዲ ተወስደ።

Tools 18. ንማይ ቤቱ ኸኣ በብሰብኣይ ኣቕረቦም እሞ ኣካን፡ ወዲ ካርሚ ወዲ ዛብዲ ወዲ ዜራሕ፡ ካብ ነገድ ይሁዳ ተወስደ፡

Tools 19. እያሱ ድማ ንኣካን፡ ወደይ፡ በጃካ፡ ንእግዚኣብሄር ኣምላኽ እስራኤል ኣኽብሮ ተናዘዘሉውን፡ እንታይ ከም ዝገበርካ ንገረኒ፡ ኣይትሕብኣለይ፡ በሎ።

Tools 20. ኣካን ድማ ንእያሱ መሊሱ በሎ፡ ሓቂ እዩ፡ ኣነ ንእግዚኣብሄር ኣምላኽ እስራኤል በዲለዮ እየ፡ ከምዝን ከምዝን ገበርኩ፡

Tools 21. ኣብቲ እተዘምተ ሓደ ጽቡቕ ባርኖስ ሰንኣርን ክልተ ሚእቲ ሲቃል ብሩርን ሓምሳ ሲቃል ዝሚዛኑ ልሳን ወርቅን ምስ ርኤኹ፡ ሽዑ ተመኔክዎ እሞ ወሰድክዎ፡ እንሆ ኸኣ፡ ኣብ ማእከል ድንኳነይ ኣብ ምድሪ፡ እቲ ብሩር ድማ ብትሕቲኡ፡ ተሐቢኡ አሎ።

Tools 22. ሽዑ እያሱ ልኡኻት ሰደደ፡ ናብቲ ድንኳን ከኣ ጐየዩ፡ እንሆ ድማ፡ ኣብ ድንኳኑ ተሐቢኡ፡ እቲ ብሩርውን ብትሕቲኡ ነበረ።

Tools 23. ካብ ማእከል እቲ ድንኳን ወሲዶም፡ ናብ እያሱን ናብ ኵሎም ደቂ እስራኤልን ኣምጺኦም ድማ፡ ኣብ ቅድሚ እግዚኣብሄር ኣንበርዎ።

Tools 24. ሽዑ እያሱ፡ ኵሉ እስራኤል ከኣ ምስኡ፡ ንኣካን ወዲ ዜራሕን ነቲ ብሩርን ባርኖስን ወርቅን ነወዳቱን ኣዋልዱን ኣብዑሩን ኣእዱጉን ኣባጊዑን ድንኳኑን ዘለዎ ዅሉን ወሲዶም፡ ናብ ጋግ ዓኰር ኣደየብዎ።

Tools 25. እያሱ ድማ፡ ስለምንታይ ኣሸገርካና፧ በለ። ኵሉ እስራኤል ድማ ብዳርባ እምኒ ቐተሎ፡ ብዳርባ እምኒ ቐቲሎም ከኣ ብሓዊ ኣንደድዎም።

Tools 26. ኣብ ልዕሊኡ ድማ እቲ ኽሳዕ እዛ መዓልቲ እዚኣ ዘሎ ዓብዪ ጨርሒ እምኒ ጨርሑሉ። እግዚኣብሄር ድማ ካብ ረስኒ ዅራኡ ተመልሱ። ስለዚ ኸኣ ስም እታ ቦታ ኽሳዕ ሎሚ ጋግ ዓኰር ይበሀል አሎ።